KATEKEŻI 25
Ir-Razziżmu u s-Sejħa għall-Fratellanza
Ir-razziżmu mhux sempliċiment problema soċjali; huwa dnub kontra Alla u kontra l-familja tal-bniedem. Fil-ħsieb, fil-kliem, fl-azzjonijiet jew fl-istrutturi soċjali, ir-razziżmu jmur kontra verità fundamentali tal-fidi tagħna: kull bniedem hu maħluq xbieha ta’ Alla, hu maħbub u mifdi minn Ġesù Kristu, u huwa msejjaħ għall-qdusija u għall-ħajja ta’ dejjem.
Din hi d-dinjità tal-bniedem: dinjità li ma tingħatax lil xi wħud biss, bħallikieku tappartjeni biss lil min hu tal-familja tagħna, tan-nazzjon tagħna jew tal-istess kultura tagħna. Ir-razziżmu jkisser din il-verità, għax jifred lill-bnedmin f’min jgħodd u min ma jgħoddx, f’min hu inkluż u min hu eskluż. Ghalhekk kull forma ta’ diskriminazzjoni minħabba s-sess, ir-razza, il-kulur, il-qagħda soċjali, il-lingwa jew ir-reliġjon għandha tingħeleb u tinqered, għax tmur kontra r-rieda ta’ Alla (Gaudium et spes, 29).
L-isqfijiet Kattoliċi fl-Istati Uniti wkoll ikkundannaw ir-razziżmu b’mod qawwi. Fl-ittra pastorali Brothers and Sisters to Us qalu: “Ħa jkun jaf kulħadd li dan huwa dnub terribbli, li jwaqqa’ għaċ-ċajt is-salib ta’ Kristu u jirredikola l-Inkarnazzjoni. Għax kull min hu ħu jew oħt ta’ ħuna Ġesù Kristu huwa wkoll ħuna u oħtna.” Huma jfakkru wkoll li r-razziżmu u l-oppressjoni ekonomika, għalkemm differenti, huma marbutin ma’ xulxin u jneżżgħu lis-soċjetà mill-umanità tagħha. Fl-2018, l-istess isqfijiet kitbu: “Ir-razziżmu għadu jħalli marka qawwija fuq il-kultura tagħna, u m’għandux post fil-qalb tan-Nisrani” (Open Wide Our Hearts). Għalhekk, sejħulna niġġieldu kemm il-preġudizzji personali kif ukoll l-istrutturi li joħolqu inġustizzja u esklużjoni.
Il-Papa Franġisku, fi Fratelli tutti, ifakkarna fil-parabbola tas-Samaritan it-Tajjeb li turi fil-prattika li ahna lkoll aħwa: is-Samaritan ma staqsiex min kien il-bniedem midrub jew minn fejn kien ġej, imma waqaf, resaq lejh u għenu. Hawn tinsab il-qalba tal-fratellanza: qabel kull tikketta hemm persuna, u qabel kull biża’ hemm ħuna jew oħtna.
Għalhekk, biex negħlbu r-razziżmu rridu nibdew minna nfusna: kif nitkellmu fuq l-oħrajn, x’naħsbu fuq il-barrani, u jekk nibqgħux siekta quddiem ċajt, stereotipi jew inġustizzji. Fl-istess ħin irridu nibnu soċjetà aktar ġusta fl-iskejjel, fuq il-post tax-xogħol, fil-liġijiet, fil-komunitajiet u fil-parroċċi tagħna. Il-Knisja hi msejħa tkun sinjal ħaj ta’ familja waħda taħt Alla, fejn kull persuna tintlaqa’ bħala ħuna jew oħtna. Inkella ma tkunx tassew ‘kattolika’, jiġifieri, universali.
Fr Raymond Zammit